Juz-Nihaal-E-Arzu Sine Mein Kya Rakhta Hun Main

Shakeel Jazib

juz nihal-e-arzu siine men kya rakhta huun main

koi bhi mausam ho ye pauda hara rakhta huun main

varna kya bandhan hai ham men kaun si zanjir hai

bas yunhi tujh par miri jaan maan sa rakhta huun main

kar-e-duniya ko bhi kar-e-ishq men shamil samajh

is liye ai zindagi teri pata rakhta huun main

main kisi mushkil men tujh ko dekh sakta huun bhala

dil-girafta kis liye hai dil baḌa rakhta huun main

be-niyazi ḳhu sahi teri magar ye dhyan rakh

lauT jaane ka abhi ik rasta rakhta huun main