kya janiye sayyad the haq agah kahan tak
samjhe na ki sidhi hai miri raah kahan tak
mantiq bhi to ik chiiz hai ai qibla o kaaba
de sakti hai kaam aap ki vallah kahan tak
aflak to is ahd men sabit hue madum
ab kya kahun jaati hai miri aah kahan tak
kuchh sanat o hirfat pe bhi lazim hai tavajjoh
akhir ye government se tankhvah kahan tak
marna bhi zaruri hai khuda bhi hai koi chiiz
ai hirs ke bando havas-e-jah kahan tak
tahsin ke laaeq tira har sher hai ‘akbar’
ahbab karen bazm men ab vaah kahan tak
Leave a Reply