Shiv Om Misra Anvar
TuuTe hue khilaune nishani men de gaya
dhoka mujhe vo ain javani men de gaya
ye aur baat misra-e-ula men kuchh nahin
lekin vo husn misra-e-sani men de gaya
dariya ne tishna-lab se siyasat ajiib ki
kuchh zahr bhi mila ke vo paani men de gaya
laaya hazar ḳhushiyan mujhe saunpne magar
phir kyuun ye ranj resha-davani men de gaya
karna paḌa na ham ko za.ifi ka intizar
vo maut ka maza bhi javani men de gaya
‘anvar’ ka haal aa ke koi dekh le zara
kaghaz ke phuul koi nishani men de gaya
Leave a Reply