Salahuddin Nayyar
fasil-e-shahr ko jab tak gira nahin denge
hamen ye log kabhi rasta nahin denge
tamam umr jo chehre ko apne paḌh na sake
ham un ke hathon men ab aa.ina nahin denge
ghuTan ho aisi ki tum khul ke saans le na sako
tumhen ham is se ziyada saza nahin denge
tujhe Dubo.enge ḳhud tere hashiya-bardar
ham apni raah se tujh ko haTa nahin denge
ye bazm-e-sh.er-o-adab kab kisi ki hai miras
jo nasl gungi ho ham ja.eza nahin denge
vo jin ke naam se ham zahr pi ga.e ‘nayyar’
ham un ke haq men kabhi bad-dua nahin denge
Leave a Reply