Jab Tilism-E-Qufl-E-Abjad Khul Gaya

Ghulam Husain Sajid

jab tilism-e-qufl-e-abjad khul gaya

hasil-e-guftar-e-sarmad khul gaya

TuuT kar aa.i hai us gul par bahar

jism lau dene laga qad khul gaya

sub.h laa.i hai riha.i ki naved

asman khulte hi gumbad khul gaya

kar-zar-e-ishq men aane ke ba.ad

rang-e-miras-e-ab-o-jad khul gaya

ḳhud-baḳhud aaya hai lab par us ka naam

ruuh par unvan-e-arshad khul gaya

reg-e-sahra le uḌi bad-e-shimal

dasht gum hote hi ma.abad khul gaya

aa ga.i ‘sajid’ zaban par dil ki baat

aaj aḳhir un ka maqsad khul gaya