apni tanha.i zindagi kar li
zabt chhalka to sha.iri kar li
rang men Dhalte hue tire main ne
shakl tak apni sanvli kar li
raat bhar asman men bhaTka
chand ne sub.h ḳhud-kushi kar li
jab zaban vaale be-vafa nikle
be-zabanon se dosti kar li
tu mire hasilon men hai to nahin
phir bhi ḳhvahish kabhi kabhi kar li
phir kiya ishq aur phir puuri
jo kasar thi rahi-sahi kar li
kuchh ne chun li ghazal ki mushkil raah
kuchh ne ghabra ke naukri kar li
Leave a Reply