Pae-Gunah Hai Teri Panah Ki Takhsis

pae-gunah hai teri panah ki takhsis

ki hai tujhi pe har ik dad-khvah ki takhsis

jo aap samjhe hain mujrim hamen to kuchh nahin Dar

ki ki hai aap hi ne do gavah ki takhsis

firaq-e-yar men be-roe ban nahin padti

asar ke vaste kar di hai aah ki takhsis

na dil churate hamara na tum khajil hote

pae-hijab hai nichi nigah ki takhsis

dikhave aur koi apna yaar zohra-jabin

jo asman nahin us rashk-e-mah ki takhsis

pahunch hi jaate kabhi phir phira ke dar pe tire

ye tu ne kaahe ko ki ek raah ki takhsis

tamam khalq-e-khuda tujh ko chahne lagti

laga na deta agar tu panah ki takhsis

vo mujh se kahte hain tum chahte nahin mujh ko

mire Dubone ko karte hain chaah ki takhsis

hai teri zarra-navazi ki ye dalil adna

ki asman ke hai ham-rah jaah ki takhsis

Leave a Comment