Sulaiman Areeb
nahin jo teri ḳhushi lab pe kyuun hansi aa.e
yahi bahut hai ki ankhon men kuchh nami aa.e
andheri raat men kasa-ba-dast baiTha huun
nahin ye aas ki ankhon men raushni aa.e
mile vo ham se magar jaise ghair milte hain
vo aa.e dil men magar jaise ajnabi aa.e
ḳhud apne haal pe roti rahi hai ye duniya
hamare haal pe duniya ko kyuun hansi aa.e
na jaane kitne zamanon se ham bahakte hain
faqih bahke to kuchh lutf-e-mai-kashi aa.e
salib-o-dar ke qisse bahut purane hain
salib-o-dar to hamrah-e-zindagi aa.e
hari na ho na sahi shaḳh-e-naḳhl gham ki ‘arib’
hamare girya-e-paiham men kyuun kami aa.e
Leave a Reply