Bazm-E-Dushman Mein Ja Ke Dekh Liya

bazm-e-dushman men ja ke dekh liya

le tujhe aazma ke dekh liya

tum ne mujh ko sata ke dekh liya

har tarah aazma ke dekh liya

un ke dil ki kuduraten na mitin

apni hasti mita ke dekh liya

kuchh nahin kuchh nahin mohabbat men

khuub ji ko jala ke dekh liya

kuchh nahin juz ghubar-e-kin-o-inad

ham ne dil men sama ke dekh liya

na mile vo kisi tarah na mile

ghair ko bhi mila ke dekh liya

kya mila naala o fughan se ‘zahir’

hashr sar par utha ke dekh liya

Leave a Comment