Na Jaane Rabt-e-Masarrat Hai Kis Qadar Gham Se

na jaane rabt-e-masarrat hai kis qadar gham se

khabar khushi ko mili bhi to chashm-e-pur-nam se

zaban kholiye khalvat men be-hijabana

chhupai jaati hai kab dil ki baat mahram se

kisi ki yaad men kya kya na ham pe biit gai

jahan ne di thi jo fursat zara hamen gham se

shuur-e-shana-kashi dekhiye unhen kab aae

mizaj-e-zist hai vabasta zulf-e-barham se

fareb-e-dost na khate to aur kya karte

yahi to rasm chali aa rahi hai aadam se

ye aaj kaun si taqsir ho gai ‘nami’

ki dost bhi to milate nahin nazar ham se

Leave a Comment