ab ham charagh ban ke sar-e-rah jal uThe
dekhen to kis tarah se bhaTakte hain qafile
jo muntazir the baat ke munh dekhte rahe
ḳhamosh rah ke ham to baḌi baat kah ga.e
kab manzilon ne chume qadam un ke hamdamo
har raah roke saath jo rah-gir chal paḌe
jaane zaban ki baat thi ya rang ruup ki
ham aap apne shahr men jo ajnabi rahe
vo log ḳhush-nasib the apni nigah men
jo har kisi ke shauq ki ḳhud dastan bane
ma.alum jin ka nam-o-nishan bhi nahin hamen
ham un ka shahr shahr pata puchhte phire
kahne ko ik jahan se ulajhte rahe magar
ai dard apne saa.e se Dar Dar ke ham jiye
Leave a Reply