Ankit Maurya
ik dafa us ko to yuun bhi azmana hai mujhe
ansuon ko aankh ka paani batana hai mujhe
jaan bahut itra raha hai ab to a.ina mira
aao a.ine ko a.ina dikhana hai mujhe
ḳhud mujhe to banna hai misra-e-ula sher men
tum ko us ka misra-e-sani banana hai mujhe
ruḳh se zulfon ko haTate aao chhat pe raat ko
asl chehra chand ka sab ko dikhana hai mujhe
us ne bola chhoḌ duun cigarette main ab to ya.ani ki
honTh se ab us ke honTon ko lagana hai mujhe
ab ziyada ho chuka hai rona-dhona hijr ka
ab to is ke ba.ad ka manzar dikhana hai mujhe
kyon kahun mujh ko mohabbat ruuh ki hai tum se jaan
aḳhirash tum ko to banhon men hi laana hai mujhe
Leave a Reply