Be-Tabi-E-Dil Ne Zar-Pa Kar

be-tabi-e-dil ne zar-pa kar

de de patka utha utha kar

ghar men daava na husn ka kar

yusuf se nikal ke samna kar

zulfon ko na chhod tu badha kar

nazuk hai girega jhonk kha kar

baithe jo vo shab naqab utha kar

bujhne lagi shama jhilmila kar

barbad na kar tu aabru ko

manind-e-habab sar utha kar

us gul ki mizha ne maar Daala

kante ki tarah sukha sukha kar

be-tabi-e-dil agar dikhaun

bijli rah jaae tilmila kar

saffak ne band band kaata

choten marin jhuka jhuka kar

allah re sozish-e-dil ai yaar

maara kis aag men jala kar

paire koi khaak bahr-e-gham men

akhir Duuba main Dhab-Dhaba kar

phabti kahti hain abr-e-tar ke

achchhi sujhi mujhe rula kar

vo mast hain arsh par tike haath

nashe men gire jo ladkhada kar

gard-e-gham ne zamin jhakai

chhoda mujhe khaak men mila kar

bose ke saval par vo bigde

munh ki khaai zaban hila kar

naala koi ban pada jo ham se

aflak ko rakh diya mita kar

khauf-e-dozakh se kanpta huun

saaqi mujhe jaam de tapa kar

vo nazaa men haal sun ke roe

kaam aai zaban ladkhada kar

qissa dil se utha dui ka

parchha ho jaae faisla kar

jab kuuch kiya ‘saba’ adam ko

rah jaenge yaar khaak uda kar

Leave a Comment