rakhna hai to phulon ko tu rakh le nigahon men
ḳhushbu to musafir hai kho ja.egi rahon men
kyuun meri mohabbat se barham ho zamin vaalo
ik aur gunah rakh lo duniya ke gunahon men
kaifiyat-e-mai dil ka darman na hui lekin
rangin to rahi duniya kuchh der nigahon men
kanTon se guzar jaana dushvar nahin lekin
kanTe hi nahin yaaro kaliyan bhi hain rahon men
parda ho to parda ho is parde ko kya kahiye
chhupte hain nigahon se rahte hain nigahon men
yaran-e-rah-e-ghurbat kya ho ga.e kya kahiye
kuchh so ga.e manzil par kuchh kho ga.e rahon men
guzri hui sadiyon ko aghaz-e-safar samjho
maazi abhi kam-sin hai farda ki nigahon men
rangin hai ‘shamim’ ab tak pairahan-e-jan apna
ham raat guzar aa.e kis ḳhvab ki banhon men
Leave a Reply