Mushaf Iqbal Tausifi
ik kutub-ḳhana huun apne darmiyan khole hue
sab kitaben safha-e-harf-e-ziyan khole hue
ik juda.i par huun hairan jis tarah koi pahaḌ
qatl par habil ke apna dahan khole hue
bad-dua-e-na-rasa.i kaam apna kar chuki
apni saari parten hai kyuun asman khole hue
band rakkho muTThiyon ko ret uḌti hai yahan
jaane kaun aa jaa.e dast-e-ra.egan khole hue
pal do pal ka saath hai ab raushni ka chal paḌen
shaam hai ik katba-e-qabr-e-javan khole hue
sahilon pe likkhi tahrir-e-hava paḌhta bhi kaun
kashtiyan thiin ḳhvahishon ke badban khole hue
Leave a Reply