Yaqoob Parwaz
ye nazzara na dekha tha faraz-e-bam se pahle
nikalta hai koi suraj ghurub-e-sham se pahle
usi ke naam kar Daale hain main ne ratjage apne
kisi ka naam leta hai jo mere naam se pahle
tumhare atishin lahje se ham ḳha.if nahin lekin
hamari baat to sun lo zara aram se pahle
sukut-e-shahar-e-ḳhamoshan bhi jis par rashk farma.e
kuchh aisi kaifiyat hoti hai har kohram se pahle
rahin-e-ab-o-dana hi sahi avargi apni
gharon ko lauT aate hain parinde shaam se pahle
ba-har-surat unhen ranj-e-asiri to uThana hai
nazar daane pe hai parvaz jin ki daam se pahle
Leave a Reply