Baat Ho Dair-O-Haram Ki Ya Watan Ki Baat Ho

Shayan Quraishi

baat ho dair-o-haram ki ya vatan ki baat ho

baat jab ho doston husn-e-chaman ki baat ho

desh ki ḳhatir ḳhushi se jo luTa dete hain jaan

un shahidan-e-vatan ke bankpan ki baat ho

qaum-o-maz.hab kya kisi ka aur kya hai rang-o-nasl

aisi baten chhoḌ kar bas ilm-o-fan ki baat ho

asr-e-hazir ne hamara dil bhi patthar kar diya

lazmi hai ab vafaon ke chalan ki baat ho

is amal se zindagi ho ja.egi asan bahut

aisa kuchh mat boliye jis men chubhan ki baat ho

ek hi rangat hai sab ke ḳhuun ki to dosto

kyuun hamare biich shaiḳh-o-barahman ki baat ho

mil ke baiThe hain to yaaro ab suna.en hal-e-dil

kuchh tumhare dil ki ho kuchh mere man ki baat ho