Tuk tu mahmil ka nishan de jald ai surat zara
kab talak bhaTke phiren ab ham se divane ḳharab
ye bhi kuchh andher hai ab zulf tere darmiyan
ghar base shane ka aur hon dil ke kashane ḳharab
dil to ḳhuun ho bah gaya aur hai jigar baaqi so ab
us ki bhi halat lagi ham ko nazar aane ḳharab
ghar base to ghar men kis ke ja basa hai bol uTh
masjiden viran hain tujh bin aur sanam-ḳhane ḳharab
sham.a bhaḌka sho.ala apna aag de fanus ko
kab talak phirte rahen gird us ke parvane ḳharab
chup ho ab to ai ‘raza’ in ḳhakiyon par rahm kar
rone se tere ho.e sab shahr-o-virane ḳharab
Leave a Reply