Ye Aur Baat Hai Har shaKHs Ke Guman Mein Nahin

Poet

ye aur baat hai har shaḳhs ke guman men nahin

zamin kahan hai jo aghosh-e-asman men nahin

ziya-faraz jahan hain hazar mah-o-nujum

charagh koi magar mere ashiyan men nahin

vafur-e-ishq ki nairangiyan are tauba

jo dil men dard hai vo dil ki dastan men nahin

tum apna tir-e-ada meri ruuh men DhunDo

in abaruon ki lachakti hui kaman men nahin

ye aur baat ki gulshan pe gir paḌe bijli

kami to koshish-e-tanzim-e-gulistan men nahin

jo apni sust-ravi ka ilaaj kar na sake

maqam us ka koi ahl-e-karvan men nahin

rumuz-e-uqba se ahl-e-zamin hon kya vaqif

kisi bhi pahlu koi rabt do-jahan men nahin

‘falak’ main kaifiyyat-e-dil se ḳhud pareshan huun

kisi fughan men asar hai kisi fughan men nahin