kisi ne kaise nibha.i hai asman se na puchh
na puchh ta.ir-e-gum-karda-ashiyan se na puchh
sahar baja-e-ḳhud ik dastan na ho jaa.e
hikayat-e-shab-e-rafta miri azaan se na puchh
tire jamal ko mahshar samajh rahe hain log
umaD ke aa.i hai ḳhilqat kahan kahan se na puchh
javab aur to mil ja.enge sabhi lekin
mira qusur hi arbab-e-do-jahan se na puchh
laga nuqush-e-qadam ka suragh aap zara
ye baagh kis ne ujaḌa hai baghban se na puchh
jo ḳhush-bayan hain suna denge yuun bhi sab ahval
jo be-zaban ka fasana hai be-zaban se na puchh
agarche ishq hai puure vajud ka dushman
magar jo dil pe guzarti hai nim-jan se na puchh
har ik nigah pe khulta nahin vo dar ‘rahil’
udhar ka rasta salar-e-karvan se na puchh
Leave a Reply