Poet
kya ye dekhen ki koi aur tamasha kya hai
ham ko ḳhud apne alava nazar aata kya hai
ba.az dariyaon ke manzar bhi ajab hote hain
aadmi sochta rah jaa.e ki sahra kya hai
vo to achchha hai ki ham hi ḳhas-o-ḳhashak nahin
varna in tez havaon ka bharosa kya hai
bujh ga.e hain jo diye phir se jala.en ki nahin
koi batlao hamen rang hava ka kya hai
ho mulaqat aur ehsas-e-mulaqat na ho
tera milna jo yahi hai to bichhaḌna kya hai
dasht ke dhuup ne ham ko ye bataya ‘ḳhavar’
apne ghar ke dar-o-divar ka saaya kya hai
Leave a Reply