zindagi hai jeb-o-daman par garan apni jagah
ḳhvahishen leti hain dil men chuTkiyan apni jagah
vaqt ke tufan men qasr-e-sang Dah kar rah ga.e
hain magar maujud shishe ke makan apni jagah
main samajhta huun ki donon hi hain juzv-e-ka.enat
jang-o-shar apni jagah amn-o-aman apni jagah
kar diye raushan junun valon ne azmat ke charagh
ahl-e-aql-o-hosh ki ḳhush-fahmiyan apni jagah
pa-e-aqdas mohsin-e-insaniyat ka chuum kar
ho ga.i hai rashk-e-gardun kahkashan apni jagah
Leave a Reply