ham to hain hasrat-e-didar ke maare hue log
ya.ani ik nargis-e-bimar ke maare hue log
jal ga.e dhuup men jo un ka shumar ek taraf
kam nahin saya-e-divar ke maare hue log
tu ne ai vaqt palaT kar bhi kabhi dekha hai
kaise hain sab tiri raftar ke maare hue log
dekhte rahte hain ḳhud apna tamasha din raat
ham hain ḳhud apne hi kirdar ke maare hue log
roz hi ḳhalq-e-ḳhuda marti hai ya dobara
zinda ho jaate hain aḳhbar ke maare hue log
teri dahliz pe iqrar ki ummid liye
phir khaḌe hain tire inkar ke maare hue log
Leave a Reply