Sher Afzal Jafri
jab soz dua men Dhalta hai
honTon pe dipak jalta hai
masjid ki zamin pe sarv-e-dua
aahon ki lu men phalta hai
ik sajda dil ke mathe par
har pichhli raat machalta hai
palkon pe larazte ashkon se
darvesh ka ruup ujalta hai
ghusse ko pi ke rind raza
nashshe men phuul ugalta hai
ḳhvahish ke ḳhuun ki barkha se
kirdar ka buuTa palta hai
allah se aankh laḌane pe
shaitan ko insan khalta hai
Leave a Reply