ishq-e-jan-e-jahan nasib hua
ik zamana mira raqib hua
mar gae ham masih ke dam men
ye bhi ik vaqia ajiib hua
un se kah do ki aap par ashiq
bekas-o-be-vatan gharib hua
na sune naale kya kisi gul ne
tujh ko kya ranj andalib hua
paas adab-e-husn-e-yar raha
ishq mere liye adiib hua
jab nakirain ne saval kiye
ya-ali kah ke main mujib hua
mera sar hoga aur un ke paanv
yavar apna agar nasib hua
jab hua qabr men saval ai ‘mehr’
ya-ali kah ke main mujib hua
Leave a Reply