tasvir-e-dost fikr-e-mujassam bani rahi
main us se bolta raha vo sochti rahi
kal shab tasavvurat ki mahfil saji rahi
jab tak tumhara zikr raha chandni rahi
shayad samajh rahi thi use bhi koi charagh
jugnu ke pichhe tez hava dauḌti rahi
paani ka intizam tha ghairon ke haath men
yuun bhi gharon men aag hamare lagi rahi
puuri hui na sar ko kaTane ki aarzu
kandhon pe mere dil ki tamanna ruki rahi
phir agli jang laḌna magar is shikast men
ye sochna paḌega kahan kya kami rahi
thi un ko sirf ek nazar dekhne ki baat
jo harf-e-aḳhiri ki tarah aḳhiri rahi
ulfat men haar jiit ka lagta nahin pata
vo shart jo lagi bhi nahin thi lagi rahi
‘saulat’ kami tumhari agar hai to maan lo
kab tak yahi kahoge ki qismat buri rahi
Leave a Reply