Syed Yasir Gilani
darkar kuchh nahin tiri mehr-o-vafa ke baad
kuchh aur mangta hi nahin is dua ke baad
qurban ja.un aisi saḳhavat pe main huzur
kya chahiye jo puchh rahe hain ata ke baad
kaisa faqir huun main tiri bargah ka
kashkol toḌ deta huun aksar sada ke baad
kal bhi ḳhuda se pahle adhuri thi ka.enat
kuchh bhi nahin hai aaj bhi duniya ḳhuda ke baad
‘yasir’ sitam ki naaz hai insaf par use
puchha mira qusur hai jis ne saza ke baad
Leave a Reply