yahi nahin ki faqat tiri justuju bhi main
ḳhud apne aap ko paane ki aarzu bhi main
udaas udaas sar-e-saghar-o-subu bhi main
yam-e-nashat ki ik mauj-e-tund-ḳhu bhi main
mujhi men gum hain ka.i tirgi ba-kaf raten
ziya-farosh sar-e-taq-e-arzu bhi main
mujhi se qa.em-o-da.em hain ghar ke sannaTe
tumhari bazm-e-tamanna ki hav-hu bhi main
nihan mujhi men hai qatil bhi aur masiha bhi
ki chak-e-zaḳhm bhi main sozan-e-rafu bhi main
ḳhud apne aap men jhankun to main bhi main na rahun
nigah ḳhud se haTa.un to char-su bhi main
jo raah chalte miri samt aankh bhi na uTha.e
usi ki bazm ka mauzu-e-guftugu bhi main
tumhari bazm se uThne ka bhi ḳhayal mujhe
zara si der Thaharne ka hila-ju bhi main
tilism-e-duri-o-qurbat ko toḌ kar ‘sadiq’
pukarta hai koi aa.ine se tu bhi main
Leave a Reply