kisi ke naam rutba aur na ḳhadd-o-ḳhal se matlab
kiraman katibin ko ḳhalq ke a.amal se matlab
ye bas sanson ki lai par naam us ka japte rahte hain
faqiron ko nahin hota miyan sur taal se matlab
mayassar aa.iin un ko zindagi ki saari saughaten
jinhen hai is jahan men shaukat-o-iqbal se matlab
agar is daur men uThna hai to uTh jaane de maula
kisi momin ko kyon ho fitna-e-dajjal se matlab
vagarna kaun rangini ke pichhe bhage duniya ki
hai jab tak zindagi tab tak hai is janjal se matlab
ham apni dhun men har-dam mahv rahte hain hamen ai dil
gharaz ḳhushiyon ki sazish se na gham ki chaal se matlab
sagan-e-dahr ka hai kaam yunhi bhaunkte rahna
magar allah valon ko hai apni chaal se matlab
vo jab ai ‘shad’ amanat ghair ki ho hi gaya hai to
na rakh tu bhi ab us ke reshmi rumal se matlab
Leave a Reply