Kisi Ke Nam Rutba Aur Na KHadd-O-Khaal Se Matlab

kisī ke naam rutba aur na ḳhadd-o-ḳhāl se matlab

kirāman kātibīñ ko ḳhalq ke a.amāl se matlab

ye bas sāñsoñ kī lai par naam us kā japte rahte haiñ

faqīroñ ko nahīñ hotā miyāñ sur taal se matlab

mayassar aa.iiñ un ko zindagī kī saarī sauġhāteñ

jinheñ hai is jahāñ meñ shaukat-o-iqbāl se matlab

agar is daur meñ uThnā hai to uTh jaane de maulā

kisī momin ko kyoñ ho fitna-e-dajjal se matlab

vagarna kaun rañgīnī ke pīchhe bhāge duniyā kī

hai jab tak zindagī tab tak hai is janjāl se matlab

ham apnī dhun meñ har-dam mahv rahte haiñ hameñ ai dil

ġharaz ḳhushiyoñ kī sāzish se na ġham kī chaal se matlab

sagān-e-dahr kā hai kaam yūñhī bhauñkte rahnā

magar allāh vāloñ ko hai apnī chaal se matlab

vo jab ai ‘shād’ amānat ġhair kī ho hī gayā hai to

na rakh tū bhī ab us ke reshmī rūmāl se matlab

Leave a Comment