Mahsus Jo Karte Ho Ye Halchal Mere Andar

mahsūs jo karte ho ye halchal mire andar

kuchh TūTtā rahtā hai musalsal mire andar

hoñThoñ pe tabassum ke gulāboñ kī numā.ish

hai nāg-phanī kā koī jañgal mire andar

mushkil hai ki ye pyaas mirī kaise miTegī

sahrā haiñ mire hoñTh to bādal mire andar

is baar jo us ne mujhe bāhar se sameTā

is baar huā ḳhvāb mukammal mire andar

is ruuh ko āzād karo jism se jaldī

mar jaa.e na ghuT ghaT ke ye pāgal mire andar

Leave a Comment