afzal-khan

Us Lamhe Tishna-Lab Ret Bhi Pani Hoti Hai

us lamhe tishna-lab ret bhi paani hoti hai

andhi chale to sahra men tughyani hoti hai

nasr men jo kuchh kah nahin sakta sher men kahta huun

is mushkil men bhi mujh ko asani hoti hai

jaane kya kya zulm parinde dekh ke aate hain

shaam Dhale pedon par marsiya-khvani hoti hai

ishq tumhara khel hai baaz aaya is khel se men

mere saath hamesha be-imani hoti hai

kyuun apni tarikh se nalan hain is shahr ke log

Dah dete hain jo taamir purani hoti hai

ye nukta ik qissa-go ne mujh ko samjhaya

har kirdar ke andar ek kahani hoti hai

itni saari yadon ke hote bhi jab dil men

virani hoti hai to hairani hoti hai

More Poems

Leave a Comment