saz-e-hasti pe abhi jhuum ke ga le mujh ko
zindagi se ye kaho aur na taale mujh ko
main ne to sub.h-e-darakhshan ki dua mangi thi
kyuun mile zard charaghon ke ujale mujh ko
tujh ko paane ke liye umar ganva di main ne
haq to banta hai ki tu apna bana le mujh ko
ye to saaqi ki jagah aur koi baitha hai
ye jo gin gin ke pilata hai piyale mujh ko
main zamane ke jhamelon men dhansa jaata huun
us se kahiye ki vo daldal se nikale mujh ko
apni khamosh tamanna ki aziyyat se nikal
jo sunana hai zara khul ke suna le mujh ko
na-tavani hi miri tab-o-tavan hai ‘adil’
main ne kab tujh se kaha tha ki bacha le mujh ko
Leave a Reply