Rashid Anwar Rashid
bas ek baar tira aks jhilmilaya tha
phir us ke ba.ad mira jism tha na saaya tha
shadid niind ka ghalba tha kuchh pata na chala
ki itni raat ga.e kaun milne aaya tha
ḳhayal aate hi ik Tiis si ubharti hai
malal aaj bhi hai tera dil dukhaya tha
mujhe pata tha dariche se raat jhankegi
isi ḳhayal se main chand le ke aaya tha
badal ga.e the manazir palak jhapakte hi
mira junun bas ik baar rang laaya tha
tum aa ga.e ho to lagta hai aaj se pahle
miri hayat pe ik bad-dua ka saaya tha
Leave a Reply