sail-e-girya ka siine se rishta bahut
ya.ani hain is ḳharabe men dariya bahut
main ne us naam se shaam rangin ki
main ne us ke havale se socha bahut
dekhne ke liye saara aalam bhi kam
chahne ke liye ek chehra bahut
is se aage to bas ḳhvab hi ḳhvab the
main ne us ko mujhe us ne dekha bahut
main bhi uljha huun manzar ke nairang se
mere pairon se lipTi hai duniya bahut
raftagan ke qadam jaise aahu ka ram
jaane valon ko raston ne roka bahut
jang-ju ma.arakon men hue surḳh-ru
bastiyan bain karti hain tanha bahut
Leave a Reply