Uvais Girach
kuchh ghazlon pe ab se hairat hoti hai
is se us se sab se hairat hoti hai
iman ki kamzori hai kuchh aur nahin
jis ko bhi maz.hab se hairat hoti hai
milne aana tum ne jab se chhoḌ diya
mujh ko tujh pe tab se hairat hoti hai
ik duuje ka jiina mushkil karte hain
is duniya men sab se hairat hoti hai
pichhli shab ik ḳhvab men suraj ko dekha
us ik raushan shab se hairat hoti hai
tum ko to ye sab kuchh raas na aata tha
tum ko yaara kab se hairat hoti hai
dariya milne aaya shayad us ko bhi
mere tishna-lab se hairat hoti hai
Leave a Reply