miri thakan mire qasd-e-safar se zahir hai
udaas shaam ka manzar sahar se zahir hai
na koi shaḳh-e-ibarat na koi lafz ka phuul
ye ahd banjh hai qaht-e-hunar se zahir hai
jo puchha kya huiin shaḳhen samar-ba-dast jo thiin
kaha ki dekh lo sab kuchh shajar se zahir hai
faqat ye vahshat-e-iz.har hai ilaaj nahin
ye bojh yuun nahin utrega sar se zahir hai
main apni raakh men ḳhvahish daba.e baiTha huun
ye aag jal ke rahegi sharar se zahir hai
vo umr-bhar ki asiri mili tamanna ko
gharib mar ke hi niklegi ghar se zahir hai
tu reza reza ta.alluq se ghar bana ‘shahid’
magar ye dasht to divar-o-dar se zahir hai
Leave a Reply