Poet
dard-e-dil ki dava kare koi
ye nahin to dua kare koi
aarzu hai jafa kare koi
ho na ye bhi to kya kare koi
ye ishare hain kis qadar ḳhamosh
in ki tafsir kya kare koi
jo bhi hai dil ka haal zahir hai
vo na samjhen to kya kare koi
arz-e-matlab pe bhi vo barham hain
kis tarah iltija kare koi
ik zamane se dushmani le kar
kyon kisi se vafa kare koi
baat teri baja hai ai naseh
dil na maane to kya kare koi
lab pe aati nahin hai dil ki baat
mera matlab ada kare koi
zabt-e-gham sheva-e-mohabbat hai
kyon jafa ka gila kare koi
jis ko bhi dekhiye vo hai be-mehr
kya kisi se gila kare koi
vo ḳhud apni jafa pe nadim hain
un se ab kya gila kare koi
meri jan-e-hazin hai mushkil men
aa hi jaa.e ḳhuda kare koi
dil-e-nadan ke sau taqaze hain
bebasi ho to kya kare koi
ai ‘kanval’ ab yahi tamanna hai
ham se ahd-e-vafa kare koi
Leave a Reply