qateel-shifai

Kaise Kaise Bhed Chhupe Hain Pyar Bhare Iqrar Ke Pichhe

kaise kaise bhed chhupe hain pyaar bhare iqrar ke pichhe

koi patthar taan raha hai shishe ki divar ke pichhe

dil men aag laga jaata hai ye bin yaar bahar ka mausam

ek tapish bhi hoti hai is thanDi si phuvar ke pichhe

soch abhi se phir kya hoga biit gai jab raat milan ki

ek udasi rah jaegi paael ki jhankar ke pichhe

kaun lagae khoj kisi ka khud-gharzi ke is jangal men

milta hai insan yahan bhi lekin ek hazar ke pichhe

nangi ho kar naach rahi hai bhuki ruhon ki majburi

jhank sako to jhank ke dekho jismon ke ambar ke pichhe

ye hakim bhi dost hai mera ye naseh bhi mera hamdam

kitne hi gham-khvar pade hain ek tire bimar ke pichhe

tera to ik dil tuuta hai yaar ‘qatil’ udaas na ho tu

log to jaan bhi de dete hain pyare apne yaar ke pichhe

More Poems

Leave a Comment