dekhe kahin mujh ko to lab-e-bam se hat jaae
is vaza se us ki mira dil kyunki na phat jaae
aa jaae kahin baad ka jhonka to maza ho
zalim tire mukhde se dupatta jo ulat jaae
ai nala-e-jan-kah bahut ho chuki bas kar
darta huun kahin niind kisi ki na uchat jaae
dekhe kahin raste men khada mujh ko to zid se
aata ho idhar ko to udhar hi ko palat jaae
chal baith ‘nisar’ ek taraf khalq se hokar
niklega vo ghar se pa kahin bhiid to chhat jaae