zarre chamak uThe hain jidhar se guzar ga.e
duniya Thahar ga.i hai jahan tum Thahar ga.e
kal hi mile the aaj ye hone laga ḳhayal
dekhe hue kisi ko mahine guzar ga.e
ai iztirab-e-shauq bura ho tira ki ham
jaate bhala kisi ki gali men magar ga.e
tera bhala ho teri mohabbat ke chaar din
duniya kisi gharib ki barbad kar ga.e
ai raat kya tujhe bhi kisi ka hai intizar
palkon se kyuun ye TuuT ke taare bikhar ga.e
ik baar paḌh ke naam tira aaj daf.atan
dil par nuqush-e-ahd-e-mohabbat ubhar ga.e
majburiyon ne baḌh ke vahin dil daba diya
nazren bacha ke paas se un ke guzar ga.e
sharma ke ek baar zara muskura to do
dekho gulon ke baagh men chehre utar ga.e
kya jaane kya guzarti kabhi tum se chhuT kar
tum ne na ki nibah ye ehsan kar ga.e
dil par kisi ki chashm-e-inayat bhi baar thi
aise bhi din ‘shahab’ kuchh apne guzar ga.e
Leave a Reply