main ne ḳhud pinjre ki khiḌki kholi hai
chiḌiya apne aap kahan kuchh boli hai
suraj ne jangal men Dere Daale hain
patjhaḌ ne bhi kheli ankh-micholi hai
yuun bahen phaila.e milti hai aa kar
barish jaise miTTi ki ham-joli hai
haa.e tashaḳhḳhus ki maari is duniya men
sab ki apni riiti apni boli hai
diip jala.e rasta takti rahti huun
vo aa.e to iid divali holi hai
us ka lahja raat ki raani ke jaisa
uf us ne ye kaisi ḳhushbu gholi hai
kaisi girani hai izzat ki roTi men
is se sasti ik banduq ki goli hai
puchh rahi hai apni maan se ik beTi
byaah ke ma.ani zevar lahnga choli hai
kab se le kar aas karam ki ya-allah
tere dar pe apni phaili jholi hai
ḳhud-gharzi ke daur men ‘sima’ rishton se
ummiden rakhti hai kitni bholi hai
Leave a Reply