Bashir Badr
chamak rahi hai paron men udaan ki khushbu
bula rahi hai bahut asman ki khushbu
bhatak rahi hai purani dulaiyan odhe
haveliyon men mire khandan ki khushbu
suna ke koi kahani hamen sulati thi
duaon jaisi bade pan-dan ki khushbu
daba tha phuul koi mez-posh ke niche
garaj rahi thi bahut pechvan ki khushbu
ajab vaqar tha sukhe sunahre balon men
udasiyon ki chamak zard lawn ki khushbu
vo itr-dan sa lahja mire buzurgon ka
rachi-basi hui urdu zaban ki khushbu
ghazal ki shakh pe ik phuul khilne vaala hai
badan se aane lagi zaafran ki khushbu
imaraton ki bulandi pe koi mausam kya
kahan se aa gai kachche makan ki khushbu
gulon pe likhti hui la-ilaha-illallah
pahadiyon se utarti azaan ki khushbu
Leave a Reply