ashk ho ankhen bhigona ho to phir
aankh men sapna salona ho to phir
kab talak baḳhiya-gari ka shauq bhi
umr bhar siina pirona ho to phir
dost internet par achchha chalo
aur gale jo lag ke rona ho to phir
vo miri dil-jui ko hazir magar
us ka hona bhi na hona ho to phir
us ko paane ki talab par soch lo
us ko paana us ko khona ho to phir
nazuki to sikhi us ne phuul se
titliyon ka bojh Dhona ho to phir
yuun jo ḳhush ho us ko hansta dekh kar
us ka hansna us ka rona ho to phir
yuun to gajron se kala.i saj ga.i
chaah us ki chandi sona ho to phir
log kahte hain ki duniya gol hai
muflisi kona-ba-kona ho to phir
‘ahmad’ apne dil ko ḳhush karne chale
aur gham dil ka khilauna ho to phir
Leave a Reply