roz-e-azal se jaari sajaon ka silsila
phir bhi thama nahin hai ḳhataon ka silsila
qaa.em hai ab bhi meri vafaon ka silsila
ik silsila hai un ki jafaon ka silsila
ab ashk-bar hote nahin hain duaon men
nakam yuun hua hai duaon ka silsila
paanv tale zamin na mila asman koi
mera safar hai jaise ḳhalaon ka silsila
azad ho chuki huun har ik silsile se main
le jaa.e ab kahin bhi havaon ka silsila
ḳhud saḳhta ḳhudaon ne jiina kiya muhal
rab jaane kab rukega ḳhudaon ka silsila
muflis ki zindagi to hai muflis ki zindagi
ḳhamosh an-kahi si sadaon ka silsila
Leave a Reply