gunjti vaadi men avaz abhi baaqi hai
taar tuute hain to kya saaz abhi baaqi hai
phir zamin khinch rahi hai mujhe apni janib
main rukun kaise ki parvaz abhi baaqi hai
maut se pahle miri maut ko likhne vaale
mere anjam ka aghaz abhi baaqi hai
tu idhar hai ki nahin itna bata de mujh ko
saare parde uthe par raaz abhi baaqi hai
vaqt ne gard kiya phuul se chehron ka jamal
par ada baaqi hai andaz abhi baaqi hai