Poet
had-e-junun se bhi aage ga.e hain divane
milegi manzil-e-maqsud kab ḳhuda jaane
kiye hain tu ne munavvar dilon ke kashane
tire vajud se abad hain sanam-ḳhane
jo tum na the to baharen ḳhizan se bad-tar thiin
tum aa ga.e to chaman ban ga.e ye virane
shab-e-firaq hujum-e-gham-o-alam ke tufail
tumhari yaad chali aa.i dil ko bahlane
tamam umr rahi yuun hi chak-damani
chale hain ahl-e-ḳhirad aaj mujh ko samjhane
‘habab’ ashk-e-nadamat hain un ki ankhon men
qubul kiije ḳhulus-o-vafa ke nazrane
Leave a Reply