zinda hua hai aaj tu marne ke ba.ad bhi
aaya hai paas baaḌh utarne ke ba.ad bhi
kin paniyon ki or mujhe pyaas le chali
niile samundaron men utarne ke ba.ad bhi
nangi haqiqaton se paḌa vasta hamen
shishon se aks aks guzarne ke ba.ad bhi
kaali ruton ke ḳhauf ne jiine nahin diya
dariya se mauj mauj ubharne ke ba.ad bhi
har lamha zindagi ko naya ruup chahiye
ik bojh ban ga.i hai sanvarne ke ba.ad bhi
ankhon men meri jagti raton ka karb hai
har zaḳhm teri yaad ka bharne ke ba.ad bhi
Leave a Reply