chand ne aaj jab ik naam liya aḳhir-e-shab
dil ne ḳhvabon se bahut kaam liya aḳhir-e-shab
haa.e vo ḳhvab ki ta.abir se sarshar bhi tha
us ki ankhon se jo in.aam liya aḳhir-e-shab
haa.e kya pyaas thi jab us ke labon se main ne
muskurata hua ik jaam liya aḳhir-e-shab
main jo girta bhi to qadmon men usi ke girta
us ne ḳhud baḌh ke mujhe thaam liya aḳhir-e-shab
zindagi bhar ki masafat ka mudava kahiye
us ki bahon men jo aram liya aḳhir-e-shab
Leave a Reply