Jaan Nisar Akhtar
tum pe kya biit ga.i kuchh to batao yaaro
main koi ghair nahin huun ki chhupao yaaro
in andheron se nikalne ki koi raah karo
ḳhun-e-dil se koi mish.al hi jalao yaaro
ek bhi ḳhvab na ho jin men vo ankhen kya hain
ik na ik ḳhvab to ankhon men basao yaaro
bojh duniya ka uTha.unga akela kab tak
ho sake tum se to kuchh haath baTao yaaro
zindagi yuun to na banhon men chali aa.egi
gham-e-dauran ke zara naaz uThao yaaro
umr-bhar qatl hua huun main tumhari ḳhatir
aḳhiri vaqt to suuli na chaḌhao yaaro
aur kuchh der tumhen dekh ke ji luun Thahro
meri balin se abhi uTh ke na jaao yaaro
Leave a Reply