Poet
kufr ek rang-e-qudrat-e-be-intiha men hai
jis but ko dekhta huun vo yad-e-khuda men hai
ashiq hai jo ki jama-e-sidq-o-safa men hai
maashuq hai jo parda-e-hilm-o-haya men hai
aalam hai mast sajda-e-janan men ta-abad
masti bala ki bada-e-”qalu-bala” men hai
iman hai aks-e-rukh to hai gesu ka aks-e-kufr
vo kaun chiiz hai jo tiri ma-siva men hai
abru ke mahv kaabe men surat ke dair men
ushshaq rukh ka silsila nur-o-ziya men hai
be-jalva-gah-e-yar kahan ye ruju-e-khalq
bahs-e-fuzul barhaman-o-parsa men hai
juuya hai bas ki ariz-o-gesu-e-yar ka
paband shaikh sajda-e-subh-o-masa men hai
raftar moajaza hai to hai sehr chaal men
shokhi ajab tarah ki tire naqsh-e-pa men hai
teri taraf ko muslim o kafir ki hai ruju
puuja men barhaman hai to zahid dua men hai
maqtul lakhon ho chuke shaeq hazar-ha
lazzat ajiib yaar ki tegh-e-jafa men hai
ik pech-o-kham men gabr-o-musalman hain mubtala
vusat bala ki yaar ki zulf-e-rasa men hai
‘bahram’ ashiqana ghazal ek aur bhi
quvvat abhi bahut tiri fikr-e-rasa men hai
Leave a Reply